|
Kailiwko dagidi pulutan!
3/13/2009 4:11:19 PM
Tunggal mumalem, agtugtugawak, agtaptapaya
Tumamdag, agpalabas nagadu a lugan
Adda dadakkel, adda babassit
Dagiti banurborda makauma
Ngem ad-adda a makatitileng
Uni ti tren a lumabas inoran-oras!
Ah mailiwak….karayan ti Vintar
Dagidi tinuno a paltat, kilawen nga udang
Dagidi bukto a bugbugian ken tilapia a nataba ken pigaran!
Isawsawmo sili nga abuyo
Huu, haaa umasuk mata, pati lapayag kaka
Ngem, aahh nagimas ketdin aya
Saanak idi a mabartek ti gin, ngem ketdi pulutan a sangkaterbang!
Dagidi pinablad a lalat, kalyente a kunada
Dagidi laplapayag, nagameran utek nagimas ketdin aya
Dagidi chicharon ni Cherelyn kasta unay karsina
Dagitay bagbagis aysus diak madaeran a di ramanan
Dagitoy dagiti il-iliwek diay San Nicolas
Kada dumteng panawen panagtutumpong
Panagvideoke dagiti agbabarkada!
Nagganas ketdin a bukiraden balinggasa ken tirem
Ta ti langada makapalagip, makaabbukay rikna!
Ta daytoy ket danggayan pay adu a katkatawa
Hmmmp sabali a talaga’t turongen sarsarita
Aglalon no makapugpugso, agshow-showerkan kaka!
No katikagna, naimas met pulutan a mangga
No saan ket mani wenno kornik a Boy Bawang ti brandna
No saan ket chicharon-bulaklak a kunada
Kailiwko a talaga pulutan a nagduduma!
Comment(s):
15
| Lastupdate:
7/7/2011 4:09:06 PM
|
Ania ti Kaipapanan ti Valentines Kenka?
2/10/2009 4:29:38 PM
Ti Valentines kunada nga aldaw dagiti puso nga agpipinnateg. No ngarud awan kapinpinnateg ta pusomon.....no ngarud adu a puso ti kapinpinnateg ta pusom....wenno diay ipatpateg ta pusom ket sabali met ti kapusona! Ayna apo....ana ngarud ita ti kaipapanan ti Valentines kenka?
Comment(s):
38
| Lastupdate:
3/13/2009 3:20:28 PM
|
Naimbag a Paskuam, Biagko!
12/20/2008 4:56:05 PM
Manen, ti Paskua ket sumangbay
Ngarud, ayat koma ti intay' ipaay
Ta no ayat ti intay' ipaay
Kasla inaldaw-aldaw a ti paskua ket sumangbay!
Comment(s):
6
| Lastupdate:
2/10/2009 4:25:36 PM
|
Thanksgiving Manen
11/14/2008 7:20:15 PM
Thanksgiving manen, ana man ngata ti pagsasanguanen? Turkey? Ayna apo awan la sabalin? Agpadigokayo man karruba!
Comment(s):
4
| Lastupdate:
11/21/2008 4:52:24 PM
|
No sumken ti iliw
7/11/2008 4:34:34 PM
"Nagrigaten, biagko
Ti agmaymaysa
Kankanayon laeng
A siiliwak kenka!"
Nagrigat ketdin ti agmaymaysa. Aggagabbet ti mapampanunot. Kasanoda ngata met itan idiay Pilipinas? Dagiti kakabsatko? Dagiti gagayyemko? Dagiti amin nga ipatpategko iti biag!
Ita ta bakasyon, nagbakasyon met ti pamilyak idiay adayo a paset ti Arimika! No kasano ti mariknak idi addada pay laeng ta Pilipinas ket kasta man met itan!
Iliw, segga, iliw ken iliw latta... Isu nga ita kanayon a dagitoy mulak a tarong, kamatis, sili, kamotig, saluyot (apaunay ket imasna ta murdongna daytoy naudin!) ti as-asikasuek. Makauma met ta kanayon a chat ta internet ta sabsabli met ti makitkita nukua. Makasuya!
Umay kay man ket ditoy ta iliwendak man ket ne bukbukodak met ti uminumen!
Mapanak koma makinateng ken Ka Aymee ngem inpadigona met aminen! Tay met la petchay ti nabatin. Mabalbalin met ketdi dagitoy natengkon a.
No mapanak dita abong ni Cris, kanayon met a pallot ti sarsaritaenda kenni Uncle Erning! Mayat met ni Uncle Erning a makipallot. Natibker met pay la ti gurgurongna a mapan makitupada!
Dita met ayan ni Manong Titz a ket kasta la unay met ti panangligawna kadagitay babbalasang. Napintas ngamin ti binnatog dagiti ipatpatayabna a kankanta! Umayka man ket mangipan uray maysa laeng a kanta ditoy Manongko napia la a dengdenggek no agsikkil daytoy kua este no sumken toy iliwko kunak koma.
Kanayon met ti inumda Christoper idiay abongna. Nagimas ketdi a ti ipapapulutanna. Dagitay bukto, igat, udang, kippi kada tilapia a dutdutan, apaunay imasnan! Kasta unay panangbussogna kada Kriselda ken Francis!
Ket ne ni Princesa idiay abong ni Cresencio, nakapinpintas met ti panagibanbanatna ti istoryana. Manen, makapasikkil ti il-iliw!
Dagita met adu a damdamag dita yan ni Rudy a ket kanayonek met a mapan pasyaren. Rudy Rumbaoa, kumustan kabsat? Friendmi daytay biktima ti domestic violence dita Hawaii isu a kasta unay sakit nakemmi met ti napagtengda a sangapamilya.
No mapanak idiay abong ni Manong Amado, ayna diak maabot dagiti balikasna! Kayatko koma a gaw-aten ngem ne naminsan ket natinnagak metten idi nagbatayak iti tugaw! Isu a napanak diay ayan ni Marvin ta kasta la unay ti pannaka-inlove na no agsarsarita. Marvin, nagsam-it siguro ta murdong ta dilam mabalin a dimo nukuan asukaran ta kapem ket nasam-it lattan!
Kasta met unay ti panangibanat ni Atty Leo dagitay news idiay abongna. English met ngamin isu a marigatanak a mangawat! Isu a kuna met ni Leilanie a mabainak a mangiposte dagitay damdamagko ta puro met English kunana. Kunak met ti nakemko ket kitaek a inta dictionary no ana ti kayatna a sawen. Ngem ne English-Spanish dictionary met tay nagatangko! Padasek la ket koma ngarud nga i-translate iti Spanish dagitay dallot dita abong ni Lei!
Mamin-aduak met a mapan pumaspasyar diay ayan ni Ading LJ ngem diak unay agpadpadlaw ta nakaad-adu met ti babbaro a bisitana nukua. Kanayon pay ni Marvin idiay hehe. Kanayon pay ti panagsakitna. Adu ngata ket ti virus nga idatdateng dagitoy mapan mangpaspasyar kenkuana. Ket ne malagipko pay tay naglamuyot a boses ni LJ. Naglaingka met gayam nga agkanta a kas kaniak! Sobra....sobra't pangasko este apalko!
Mapmapanak pay diay abong ni Matt ngem awanen, nginilaw met tay indasarna a pulutanen saan a kas daydi immuna ta adu ngamin ti rekadona daydi. Rabakem ta agsasallupang ti ima a kumaut idiay plato ket ne adu pay ti di nagbugbuggo!
Mapmapanak pay diay abong ni Ruby ta kumkumustaek dagitay dati a kaopisinaak dita NSO ta nagobra met isuna idiay idi. Ket ne dagitay taga Ilocos Sur addada met idiay!
Ne ket sursurando ka met gayam kunayo ngata kaniak a. Ana ngarud ket mailiwak met. Ana, agmootak ngarud?
Comment(s):
44
| Lastupdate:
9/21/2008 11:29:39 AM
|
|