Ayanmon,  Nagrebcan

(Ken ni Manuel Estabillo Arguilla)

Dagiti suli ni lagip

Idiay la kadin a maasarakan

Dagiti di matawaran

A gapuanan plumam –

Dagiti sinuratmo a nagpaay

Nakabigbigan Nagrebcan.

Ngem apay a diak matimudan

Rag-o iti nakaipasngayan

Wenno makita man laeng

Tanda a nakabigbigam?

“Dagiti billit-tuleng ken

Uraor ni Labang.”

(Agkarayam ti pagtaengam,

Simbolo kadin pannakapunas

Dagiti naindaklan a gapuanam

Iti bukodmo a garit-kulturam?)

Nagtubon ti samon iti dalan,

Awanen pamalatpatan a makitak

Tapno innak koma tuntonen

Ti “Langit Nabunubonan iti Bituen.”

Sadin’ ti ayan ti insenso:

Ragsak, liday, balligi, kinapudno?

Dagiti prinsipio ken pammati

Idinto a nabaybay-annakan annakmo?

DANILO C. CABURIAN

Agoo, La Union

Naipablaak iti Sirmata

Marso, 2006