Daniw

Masapul nga ababa ti daniw

A kas pitik naibugas nga arasaas

Iti bakud ti ulimek ngem namsek

A kas bukel a daldalaganen

Iti nabara a dengngep ti daga.

Apay a saan a kristal ti lansad ti nalitnaw a dan-aw

Dagiti matam – naulimek ngem

Sibibiag nga aweng iti sardam

No matnag ti ellek ti maladaga

A makasirip iti darudar iti daya?

Mabalin a rumasok a tibbayo

Iti barukong ti nateppelan a balikas

Kalpasan ti panagregreg dagiti sabong

Iti bakrang ti agil-ilad a karayan.

Ti daniwko ti payak ti rabii

rinibu a kuerdas a naitempla

iti ayug ti Dios a nasursurok

manipud binggas ti kawayan

nasarakak iti kanta dagiti tukling

nariknak ti pulso ti arbis,

nasay-upko ti banglo ti rettab

ken natiliwko ti sinamar ni pintas.

*Aamin a letra C  iti naipablaak  a daniw, nasukatan iti letra K  para iti daytoy nga  antolohia

CRESCENCIA  R. ALCANTARA

Flora, Sto. Domingo, Ilocos Sur

(Agnaed itan ni CRA iti Namnama Village

San Fernando City, La Union )

Naipablaak iti Bannawag

Agosto 15, 1955