GUMIL La Union,

Agbiagka!

A-garisangasang ti bilegmo

G-umimpaw iti utek, naitukit iti puso

B-alagebegmo, dumanarudor iti amin  disso

I-matonam, pluma ni beterano, agdadamo, agtutubo

A-nnongem ti pannakaitandudo, kultura ni Ilokano

G-ubuayan ti literatura ni Saluyot a naprogreso!

T-a sikat’ salaknib ti nadarisay a pluma

I-gam nga addaan nagpaiduma a pigsa.

G-unglo a naayat, mapagtalkan, pagkamangan

U-lidan iti lubong ti panagsuratan

M-annakabalin nga Apo, inka kad’ paraburan

I-lokano a mannurat, sika kad’ mangidalan

L-umayog koma plumada, agsaknap sangalubongan.

L-ayap kayarigam, bagnos ti kaaduan

A-gatibuor ti ayamuommo, kas rosas a nalasbang.

U-buob ti plumam, nasay-up da Apo Pel ti GUMIL Langit

N-aindaklan a saguday, kababalin, kenka naipatawid

I-lokano a pagtamdan, kinatakneng, kinatibker kas luppiit

O-Dios, itan-okdaka iti impaaymo nga ayat ken kinasaririt

N-akemmo koma a rumangpaya latta, talento iti panangikur-it!

Ruknoy a Daniw ti

PLUMA NI BUCANEG-Young Ilokano Writers Club

iti GUMIL La Union idi Disiembre 10, 2005

iti Acapulco Beach Resort, San Fernando City 

Siudad ti San Fernando, La Union

Naipablaak iti Pluma ni Bucaneg

Mini-News Magasin, Disiembre 2005