Kenka, Manong Pel

Nakaipasdekkan iti padeppa ti biag

Intugotmo dagiti sapatam

Imbatim dagiti sanikuam

Batonlagip a pagtitinnawidanmi,

A sagibo ti nabalitokan a plumam.

Dagiti pammatim a di maumag

Dana a nangmuli kadakami

Anian a nagkas- ang no iwaksimi

Dayta a bin- i.

Wen, naigameren daram tapok iti barukong ti nasion

Simmagepsep a kas pakasaritaan panawen

Gameng a naitalimeng- pakalaglagipan

No ti aranaar- sinamar agsapa agbukar

Lagipmi kenka dinto agmawmaw.

Iti lugar nagpasagam pinullo a tawen

Kumarayo ayat- ragsak, iliw- sirib

Lamiis ken darang lailo’t aglawlaw

Samiweng- arasaas bulong makidangdanggay

Salinong pagtaengam, mannurat sagibom naummong.

Inulilam a balay- sirib iti arpad Namnama Village

Iti La Union imbukbukmo ti sirib- kabaelam

Tapno rumangpaya,  sumantak literatura Ilokana

GUMIL puon biag ken ladingitmo

Impaaymo amin a kabaelam

Tapno ti arapaap kaaduan matungpal

Ta sika ti kakaisuna a pagsadagan.

Iti bibliotekam naurnos  ti biagmo

Napasag a mangilablaban kas martir

Tunggal agtedted a tinta ti pluma

Maikur-it iti papel  dagiti balikas

A nabalitokan, nagpatinggan.

Awan umasping liday,  rigat sinaklotmo, sinagabam

Di maartapan bilegmo a nakidangadang

Ti pagimbagan tao, literatura ti Kailokuan

Lagipmo ikankanta samiweng ti anginna

Agbabawi napalabas, nangdasay kenka, Manong Pel.

HENRY R. TANGALIN

Brgy. Ortiz, Naguilian, La Union

Naipablaak iti GLU Phantasmagoria, 2004