Pirma ti Dios

Garakgak dagiti tukak

Arimpadek dagiti banyas

Alingaas dagiti beklat

Tawitwit dagiti billit

Rungiit dagiti marabutit

Nakasamsam-it a sonata

Makasalibukag iti rikna.

Nalitnaw a waig, karayan ken baybay

Turturod, bambantay, agaabay

Pinuon ti kaykayo,

Agaassideg, agaaddayo

Agkakalibnos nadumaduma a sabsabong

Agayamuom, agbabatog, agtataripnong

Makaay-ayo a buya

Kinayawam ‘toy puso ken rikna.

Ti nakaparsuaan

Maysa nga obra maestra

Inlanad ti Dios ti pirmana!

JOSEPH  R. SERMONIA 

Tuddingan, Naguilian

La Union

Naipablaak iti Bannawag

Pebrero 16, 2004