iluko.com - website a magustoan a pagpalpallailangan dagiti pada a nangisit ti sikona.

Articles

 

Skip Navigation LinksHome > Articles Main Page > Article


AUTHOR

leonardo rosqueta agunoy
iCom page



Salaysay


Dumngegka iti patigmaan (maikadua iti uppat a paset)

02/13/2018


NAILASAGEN ti panagulbod ti tao. Gapu iti ayatna a di maibabain, maisagmak, maibaba ti kinataona iti imatang ti gimong. No nagtakawka ti itlog, uray adda mangibaga a nasalamaannaka a nagkaradas ti itlog iti baki, ibagam a dika nagtakaw. Agrabiarka. Kumaritka. Ipambarmo a pammadpadakesda laeng kenka. Saan ngamin a nalaka ti matiliwan a nagbasol. Saan a nalaka ti maibabain. Saan a nalaka ti madusa, malais, makatawaan, kdpy.

Malagipko daydi estoria kadakami. Pudno ngata ta adu met ti agestoria iti daytoy. Iti maysa a lugar a nasulinek iti Kailokuan, nainget ti paglinteganda. Uray laeng ti agtakaw ti itlog no la ketdi mapaneknekan a nagtakaw ti mapabpabasol, mapuyotan ti tangguyob ti purok/gunglo. Ilawlawda kano iti desdes wenno kangrunaan a dalan ti purok/gunglo/barangay. Ipukpukkawto ti nagtakaw ti itlog ti: “Didak tultuladen, kalugaran. Nagtakawak ti itlog, didak padpadaen…”

No kasta ti pannusa iti nagsalungasing iti linteg/pagalagadan, anian a pannakaibabain? Uray awan sa man ti maipataw a multa a nasken a bayadan? Anian a pannakaibabain?

Gapu iti dayta a kinapudno, napimpintas ngarud nga amang iti panagulbod latta. Uray adu ti mangipaneknek a nagtakawka ti itlog. Nabalsamaren ti panag-razon-mo a saan a sika ti nagtakaw ti itlog.

Ti makunak, gapu ta dakes ti ibungana ti panagtakaw, aglalo no di kayat ti maibabain, dimo ar-aramiden ti agtakaw. Agtrabahoka. Agsapulka iti kasapulam. Nalabes a kinaagum ti agtakaw iti kukua ti sabali. Aguman ti agpaay iti sabali a tao.

Malagipko ita ti pagsasao daydi amami kadakami nga annakna. Adukami ngamin nga agkakabsat ken nakanumnumo ti panagbiagmi. Mannalonkami laeng iti nasulinek a lugar. Kunana, uray agkaradukod ti boksit no adda dayaw a bassit.

Uray awan ti ap-ap (taraon) ti boksit no adda dayaw iti imatang ti gimong ken iti Namarsua. Gambang ti kaibatoganna ti binalkot a kuarta ken ginabsuon a kinabaknang no nagtaud iti dakes nga aramid.

Pimmusay daydi ama a napanglaw. Napanglawkami met nga inulilana. Nabati ketdi kadakami iti ayat, panagpipinnateg ken kappia. Batonlagip kadakami ti kapanunotanna. Patigmaan ti nanumo nga ama. Patigmaan ti responsable nga ama. Ammona ti pateg ti dayaw ti familia uray kinapanglaw ti adda.





Rate this Article
Low <---------------------------------> High



Please login to rate this Article