Sarita

Ladawan (ti matukmaam kukuam paset 3) 07/29/2010 Inalayayan ti danag dagiti dadakkel ko iti inda pannakakita ti ininut a panagsublik iti kinasimbeng. Nasarakak ti rumuaran a ruangan ti nakaitawtawak a lubong ti ladingit babaen iti maysa a surat a nagkuna; Dear Natu, I know you are hurting and maybe this is not the right time to hear from me. But I just would like you to know that I am still here, waiting, despite all what happened. With so much love, Timm U. Gao Nariknak a gimmigis ti iisemak ket naamiris ko a dayta ti kaunaan a nariknak nga isem manipud natibnokan iti pait ti biag ko. Manipud iti ayan ko a nakatugaw iti maysa a paset ti paraangan mi, namingmingak dagiti inmulak a rosas ta kasla man sipapasindayag da a mangipaypayapay kaniak kadagiti korola da. Immapay iti panunot ko ti naraniag ken kasla sibibiag a ladawan. Tinangad ko ti langit, nangayed ti kinaasul na a napattopattokan ti naiingpis nga ulep nga iti baet da ket naiyuged ti narangrang a lawag, a kas man nabalitokan a dalan nga agturong kadagiti mulak a rosas. Iti di unay adayo a kakaykayuan iti abagatan ti balay mi, mangngeg ko ti naidumduma a samiweng a parnuayen ti panagsasarita dagiti nadumaduma a tumatayab. Binasak manen ti surat ket iti dayta a gundaway pinadas ko a lansaden no adda sabali a kaipapanan dagiti nabukel a sarita. Mabalin nga awan sabali a kayat ni Sheryl nga ipasimudaag no di ti awan patinggana a panagayat na. Ngem adda sumarsari a kapanunotan kaniak a ti kasla kayat ni Sheryl nga ipasimudaag ket amang a nakarkaro ti linak-am na a sakit ti nakem ngem siak. Wenno, mabalin ngata a kastoy ti maidukit iti panunot ti tao nga adda ammo na a nagbasolan na? Numan pay awan dakes a gandat ti sabali a tao ket ipapan na a kasta? Ikidag ti riknak a subalitan ti surat na tapno idawat ko ti pammakawan dagiti aramid ko a nangted kaniana ti sakit ti nakem. Ngem kasla a diak maipagod ti panunot ko iti plumak tapno ikur-it na dagiti balikas a mangiladawan ti kaririknak. Kasla adda nagkuna nga adda iti inuneg ti tao ti pudno a gerra ti naimbag ken dakes. Ket ti ibunga na isu ti mabalin a panaggerra wenno panagkapya dagiti pagarian, wenno nasyon. Ipapan ko a pudno agsipudta tao met ti mangngeddeng iti rumbeng wenno di rumbeng nga aramiden na. Adda met ti nagkuna a no ayat ti ibingay mo ket ayat met laeng ti magun-od mo. Ket kasla nga ayat latta ti ipaduyakyak ni Sheryl iti laksid ti amin a napasamak. Numan pay kasta, saan a makapagsubalit ti riknak agsipudta kasla adda bain a mangtiped ti ania man a rikna a rumusrusing para kaniana. Kasla a diak maikari iti kinapudno ti panagayat na. Ket iti kasta a kapanunotan naiyalengaleng ko a subalitan ti surat na. Ngem mabalin a bassit a talaga ti lubong a pagpusiposan ti tao. Pinadas ko ti gasat ko iti ballasiw-taaw, idiay Saudi Arabia, iti uneg ti kadadakkelan a base-militar iti akin-amianan a paset dayta a pagarian ti nakaipanak. Diak pinagarup nga iti daytoy a lugar ket isu ti pagkurusan manen ti dalan mi ken ni Sheryl. Idiay Saudi Arabia ken dadduma pay a pagarian dagiti arabo, ti Huebes ken Biyernes ket isu ti pinaka-Sabado ken Dominggo dagiti tattao. Ket kadagitoy nga aldaw adu ti kailian a lumwas kadagiti il-ili tapno makipinnadamag kadagiti kamaris da, wenno aggatang kadagiti kasapulan da, wenno makiinnarem-mata – ta kasta pay laeng iti damo no saan mo pay a natakuatan ti kasasayaatan a wagas tapno maludunam daytay kayat mo, no adda tured mo nga agsukir iti pagarian dagiti Arabo. Mabalin nga umlek ka ngem ti tured ket buangayen met, no dadduma, ti ot-ot ti panagmaymaysa ken iliw iti ablon ti sabali nga ima. Maysa a malem ti Huebes, kas gagangay nga araramidek, inparadak ti lugan ko iti sango ti FM Restaurant, kukua ken imanmanehar ti gayyem ko a Bikolano. Gapgapuk a nangsuknar, iti balay ti gayyem na nga addaan pamilya, daytay kagabgabbok iti sagpaminsan ket riknak ti nabanbannog unay. Kaarig na met ngamin daytay atap a kabalyo a mola a narigat a rendaan. Mapanpanunot ko no dadduma a mabalin a maigapu iti kinaatiddog unay ti araripitanna. Saan mo man a sirigen makitam latta a nakatamdag uray nakatakder isuna. Ti atar na ket manen a manen ket arig na pay ketdin daytay riknak ti agburis isu nga iyaludaid ko a dagus ti agpakada. “Hey, Padi,” Inpasabat a sigud ti gayyem ko idi sumrekak iti restaurant. Padi ti kuna dagiti Bikolano iti pare. “Parang puyat ka na naman ah.” Inkatawa na. Mabalin nga adda nangnangngeg na ngem diak met kayat a patalgedan. “On Call ako padi, problema sa planta,” pinangilibak ko. Para kaniak ngamin ket isu laeng ti rumbeng uray pay no nasinged a gayyem ko ti agsaludsod. “Sige, maupo ka lang at baka di ka makaya ng tuhod mo,” inkantiyaw na. “Pasarapin ko muna itong paborito mong pinapaitang kambing.” Iti uneg ti restaurant ket adda pagayayaman dagiti ubbing iti akin-kanawan a paset na. Naaladan iti iniket a kasla kikit ti kadadakkel na a tali ken naaplagan ti alpombra. Adda pagalus-usan, indayon, ken sinan-balay a pagusokusokan ket kasta unay ariwawa ti uppat nga ubbing nga agaayam. Mabalin a nagannak da dagiti nakatugaw iti lamisaan iti asideg ti pagayayaman ta kanayon da ida a sutsotan. “Good afternoon po mga kabayan,” inkablaaw ko kaniada idi mapanak agtugaw iti akin-kanigid a suli. “Good afternoon din kabayan,” insungbat da a nangisurot ti panagkita da kaniak iti suli a papanak. Ararububekon ti digo ti pinapaitan idi aganit-it ti sarming a ruangan ti restaurant. Tinaldiapak. Simrek ti dua a babbai a nakabado ken nakadalungdong iti nangisit. Umigopak koma manen idi adda nakulding iti lagip ko ket sigud nga insublik ti panagkitak iti maysa kadagiti dua a simrek. Mingmingmingannak met a kasta unay mulagat na. Naiyappot na ti kanawan nga ima na iti ngiwat na idi naigutad ko ti timmakder. “Ollyhh?” kasla naiyesngaw na. Inkapetna ti kanigid nga ima na iti takiag ti kadua na a kasla kasapulan na ti pagsadagan. “Oh,” naiyesngaw na manen a nangtapik-tapik iti barukong na. “My God!” Naala na ti immaddang a kasla kayatnak a darupen. “Hoooopps! Behave, may multong darating,” inballaag ti gayyem ko nga akin-kukua iti restaurant a ti kayat na a sawen ket adda umay a mutawwa wenno padi ti Islam. Agpasyar da dagitoy aglalo kadagiti ayuyang ti Pinoy tapno awan dudua nga amin a tao ket sumurot iti paglintegan ti pagarian. Intugaw ko ket intuloy ko manen ti nangan ngem ti panunot ko ket naipagod iti kaadda ti babai a nabayagen a diak nakitkita, sumagmamano laeng nga addang iti ayan ko, ngem mabalin a diak pay maaddaan iti uray laeng bassit a gundaway tapno kumablaaw man laeng koma maigapu iti paglintegan daytoy a lugar. Ngem ti biag, kunada ngarud, no pagasaten na ti tao ket ited na amin a gundaway. Limmabas laeng dagiti mutawwa ket iti apagapaman addan a nakatugaw ni Sheryl iti kaabay ko a lamisaan. Para iti seguridad mi saan na a mabalin ti makikatugaw kaniak iti publiko, a kas iti dayta a restaurant, ta saan kami met nga agassawa. “Hi, kumusta?” agtibbatibbayo ti barukong ko a pinangirugik. “Of all places ditoy pay ti napili ti gasat a pagsarakan ta manen.” “Olly, I am so happy,” kinuna na. “Can’t you realize what this means?” Inukrad na dagiti dakulap na iti sangona. “First of all I would like to say sorry,” saan kon a pinalabas ti gundaway a mangidawat iti pammakawan ti aniaman a naaramid ko a dakes kaniana. “NO!” insippaw na a sigud. “Don’t be. Just realize what all these means. Ken alaem daytoy numerok ta makapagsarita ta a nalaing.” Kinaut na ti pluma ken bassit a kuaderno iti bag na ket inkur-it na ti numero a tawagak. “Please?” inpakaasi na. Awan ti naananay a gundaway a pinagsarita mi maigapu ta naipukkawen ti panag-sala wenno panagkararag iti Al-Maghreb ket masapul nga amin a padakker ti komersio ket maisara ken masapul a rumuar amin a tao. Iti dayta, amin a muslim ket mapan agkararag idiay moske ta ti pammati da, segun iti Koran, ket mas a magunggunaan ti mangidaton ti kararag iti moske a kaduam ti gimong ngem ti mangidaton ti kararag nga agmaymaysa iti bukod mo a pagtaengan. Saan kamin a nagkita pay kalpasan na. Nakitak ida a naglugan iti bus ti North West Armed Forces Hospital – kadakkelan nga ospital ti militar nga adda iti uneg ti King Abdulaziz Military City iti dayta a paset ti pagarian. Tunggal oras ti panagbiyahe ti bus manipud alas-diyes ti agsapa agingga iti alas-onse ti rabii. “Magkakilala pala kayo ni She, tumawag sa akin at hiningi ang number mo,” kasla pinangimtuod a kinuna ti gayyem ko nga akinkukua ti restaurant. Nalpasen ti sala wenno panagkararag ket nagsubliak iti restaurant ta nagpalutoak ti iyawid ko. “Ah, kababayan ko,” ti ababa a sungbat ko. Diak kayat ti mangibingay iti aniaman a paset ti pakasaritaan mi kenni Sheryl. “Heh, Mas pa duon ang sinabi niya,” inngirsi na. “Malihim ka talaga. Pero alam mo, napakabait talaga ‘yang si She. Maganda at hindi naman suplada pero ilag ang kalalakihan sa kanya. Ewan ko ba.” “Ganuon ba, kababayan ko talaga siya,” inpatalged ko. Kayat ko nga idamag no ania ti naibaga ni Sheryl kaniana ngem nagduduaak. “At talagang maganda,” kinunak laengen ta amangan manubsubok laeng ti gayyem ko. Naipukkaw ti maudi a panagkararag, ti Al-Isha, idi makaawidak iti kampo mi. Panpanunotek pay laeng ti panagkita mi kenni Sheryl. No ututobek ket gasat sa metten ti mangipagpagna ti biag mi. Awan pulos ti pannakaammok nga adda isuna iti daytoy a lugar ket mabalin a kasta met isuna. Pinidot ko ti telepono ket intugkel ko dagiti numero nga inkur-it na iti papel. “Will you connect me to 211, please?” Inpakaasik iti operator a kasla agsasao a Bangladesh. “Shorey, not allowed,” insungbat na ket intupaknan ti awditibo. Kasta unay rurod ko. Inyuldag ko iti kamak a mangpanpanunot ti nasayaat nga aramidek tapno ikabitnak ti diaske a Bangladesh iti telepono ni Sheryl. Nalagip ko ti paboritok unay a buybuyaen, ti A-team. Apay ketdin a saan nakunak iti nakem ko. Intugkel ko manen iti telepono ti numero ni Sheryl. “This is Dr. Faustino Suarez and I would like to talk to the resident of 211 regarding a patient,” kinunak iti boses nga Amerikano. “Jez a mement dekter,” kuna ti kasla agsasao a Bangladesh nga operator ket madamdama pay adda mangngegkon a kiriring. Tiniped ko ti ellek ko. “Hellow, yes doctor,” nasam-it gayam a denggen ti boses ni Sheryl iti telepono. “Siak daytoy,” kunak a sigud. “Ayyyy, Ollyyyyy, kunak to pay,” kasta unay iriag na. “Awan ti doktor mi a Faustino Suarez ‘su a masmasdaawak, sika gayam!” ket inbuatit nan ti nagkatawa. “Sipik ingles,” semngat a boses ti operator. “You shut up!” inbugtak ni Sheryl. “And disconnect your line otherwise I will report you to the management.” Apagapaman ket nakangngeg kami iti klik. “Kasta ka gayam kauyong,” kinunak. “Su met lang a lislisyan da ka dagiti lallaki ditoy.” Kayat ko nga ibabawi ti inibbatak ta kasla napaulimek isuna. “Olly,” idi kuan inbettak na. “Memesa lang ti lalaki iti biag ko. Mamati ka man wenno saan ngem dayta ti kinapudno,” madlaw ko ti kasla panangtiped na iti rikna na nga agsangit. “Manipud daydi napasamak kadata inkarik a siksikanto laeng ti ayatek. Saan ko nga inlinged ti napasamak kadagiti dadakkel ko ‘su nga inyalisdak ti pageskwelaan tapno maragpat ko met ti arapaap da a makapagturposak. Inkarik kaniada nga adaywan ka biit….” Saan nan a nalapdan ti agsangit. Nabayag a nagananogog ket awan ti ammok nga ibaga a pangayayo. “Ngem saan, Olly,” intuloy na manen idi maala na ti rikna na. “Kanayon a makidamagak kadagiti pasamak mo ket kanayon ka a palagipan nga addaak laeng nga agururay. Ngem dagiti supapak mo……..,” agsangit manen. “I am sorry,” laeng ti naiyebkas ko. No mabalin laeng koma a talaytayek ti linya ti telepono, tapno mapan ko andingayen wenno appongolen, ket inaramid kon. “Olly, saan a dayta ti kayat ko a mangngeg,” insengngat na. “Padasek ti agsupapak iti kasasayaatan a wagas,” kinunak a kas pinangsubok ti kayat na a pagturongan mi. “Saan a dayta ti kayat ko a mangngeg, Olly, “ kinunana manen. “No ayat ti kalikagumam ket padasek nga ipaay tapno makapagsupapakak,” inbueltak. “You are hurting me,” inpatigmaan na. “I-I love you,” kinunak. “Kayat ko koma nga ibaga dayta iti mismo a sanguanam ngem mapilit ka.” “Oh, Ollyyy…Ollyyy....,” insangsangit na ket alusiisennak ta diak kayat ti masangsangitan iti kasta. “Kastoy gayam ti rikna ti mabagaam iti kasta,” idi agangay kinuna na iti baet dagiti saibbek a nasagpawan ti sumagmamano nga ellek. “You made me so happy.” Ti lima nga oras a tungtongan ket ababa laeng gayam no idilig iti kinawatiwat ti dinalanan mi a kayat mi a lagipen. Nadakamat pay dita dagiti panggep mi iti masakbayan a kas koma ti panaggiddan mi nga agawid tapno agpakasar uray no iti hues laeng. Umadanin ti agsapa ngem kaskasdi nga awan mayat nga agparbeng iti karayo ti turog. Saan a maputpotpot dagiti panagpinnakada agingga a napagtinnongan mi ti panagsarak mi manen iti dayta nga aldaw babaen iti panagbuya mi ti liga ti basketball a maaramid iti gymnasium ti ospital nga ayanna. Kasla apag-turog ko pay laeng idi bukibokennak ti kiriring ti telepono. Masadsadutak a nangarikap ti telepono iti rabaw ti lamisaan. Makaparurod met no dadduma ti agsungbatsungbat ti telepono aglalo no problema iti trabaho ti iyayab da ket mabalin nga isu man daytoyen. “Hello,” awan gaganaygayak a nangkuna. “O, hi, sweetheart, alas tres na,” anian aya a sam-it ti boses na. Naimurmurayanak a dagus ket bimmaringkuasakon a bimmangon. “O, hi, sika gayam,” sigud ko nga insungbat. “Bag man ta timmawag ka,” pinagyaman ko. “Eii, no ‘wan met la’t mauraykon,” kasla inpasugnod na. “Ah, napintas ngamin ti tagtagainep ko sika,” inyangaw ko. “Kasla sika ken siak iti kam…..” “Ayna, Olly, dayta la tuktukma ti addadta ulom,” inballaet na a sigud. “Umayka ketdin ta kaduaennak a mangan sakbay a mangrugi ti ayayam.” Nagpinnakada kami ket dinardaraskon ti nagpelles. Di agbayag sumayabsaben ti lugan ko a mangununor ti King Abdulaziz Road nga agturong iti Military City. Agarup kinse minutos idi agparadaak iti sikigan ti Recreation Centre a naiyampir iti dua tukad a nagsinan-sapatos ti kabalyo a pasdek a pagigiyanan dagiti babbai a trabahantes ti ospital. Nawanawanak a sigud ni Sheryl a nakatakder iti sango ti pasdek. Ti makaray-aw-rikna a kurbada ti pammagi na ket saan nga inpaidam ti kasla naipegket laeng a puraw a blusa ken tukong a pantalon na. “Kunak man no siak laeng ti James Bond ti biag mo?” Inpariknak ti imon ko idi makaasidegak iti ayan na. Kayat na nga ibalud dagiti matak iti perreng na ngem inggagarak nga inyalis ti panagkitak iti barukong na. “For your eyes only,” inkeddel na iti bakrang ko idi mautob na ti kayat ko a sawen. “Umunegtan ta baka masalaw na ta dagita red cap ditoy.” Inballaag na. Ti Recreation Centre, rek ti awag ti kaaduan, ti ospital ket nabingaybingay iti adu a paset. No sumrek ka, madupar mo a sigud ti pagayayaman kadagiti ballgames a kas koma basketball, tennis ken volleyball. Iti makanawan a paset na ket ti di unay dakkel, ngem di met makuna a bassit, a minuyongan a napattopattokan iti babassit a lamisaan ken pagtugawan. Naipalawlaw iti minuyongan ti pagbuyaan ti pelikula, Library, pagay-ayaman ti bilyar, pagay-ayaman ti table tennis, bassit a tiendaan, ken kuarto a mabalin a pakaangayan ti nadumaduma nga okasyon. Adda ruangan iti abay ti bassit a tiendaan nga agturong iti swimming Pool ken pagensayoan iti tennis- walling a kunada. Iti batog ti kuarto a pagbuyaan ti pelikula ti pinili na a pagpuestoan mi. Ti panagkunak ket nasamsamek ngem kadagiti dadduma a paset ti minuyongan ta agarup saan a madlaw nga adda pagtutugawan iti dayta a paset maigapu iti kapuskol dagiti masetas iti aglawlaw na. Immapay a sigud iti panunot ko no kasano ti pannakaammo ni Sheryl iti daytoy a lugar. “Tambayan ti barkada daytoy, exclusive. Ngem binagaak ida nga awan umumay ta kasinnarak ko ti VIP ti biag ko.” Inpalawag na uray diak pay laeng naidamag ti kayat ko. Pagamamuan rinakepnakon. “I missed you, Olly, so much!” Inyarasaas na. Mariknak a kasla agtigtigerger dagiti laslasag na. Tinangad na ti rupak. Nagpinnerreng kami ket naanninawak kadagiti mata na ti iliw. Tinalyaw ko ti aglawlaw. “Don’t worry, barkadak dagita adda dita, ipaltiing da no adda pugot nga agpasyapasyar,” inyisem na ket nagbattiyad a nangigaw-at ti bibig na kadagiti bibig ko. Awan naaramidak, numan pay ibuteng ko ti pannakasukal mi, no di subadan ti napudot nga agek na. Makunak a dagiti agek na, iti maikadua a gundaway, ket nanannanam agsipudta adda ramen na nga iliw a kayat na nga ipapas. Ngem pagamuan laengen ta adda nakurengreng a gitara. Immibbat a sigud ket nagtugaw iti bangir ti lamisaan. Inukarkaranna ti basket nga adda iti kaabay na a tugaw. Umisisem a nangtalyaw kaniak a kas na kunkuna, “kitam?” “Kastoy kadi a kanayon ti modus operandi yo?” nakusel ti iisemak a nagsaludsod a nangpunas ti isem na. Inturong na ti imatang na iti basket ket kasla maikulkuleng a nangiruar a saggaysa kadagiti linaon na. “I know where you are going, Olly,” pagamuan insungbat na a nangtangad kaniak. “Ngem saanak a kasta. Kenka laeng a kastoyak,” timrem ti lua kadagiti mata na. Inyappot na a sigud ti kanawan a dakulap na iti ngiwat na a kasla pangtiped na ti iruruar ti napigsa a panagsaibbek. Nalagip ko ti naibaga kaniak ti gayyem ko nga akin-kukua ti FM Restaurant, “Ilag sa kanya ang kalalakihan dito, ewan ko ba.” Ket gapu iti dayta kayat ko nga abayen, kayat ko nga andingayen, kayat ko nga ibaga a saan ko nga inggagara, ngem no aramidek a kasta ket amangan mairuam a kastoy met ti aramiden na tunggal adda saan na a kayat. Namindua a nakurengreng ti gitara iti di unay adayo, no ania ti kayat da nga ipakaammo ket awan pangipagarupak. “Agdamag ka, Olly, no adda dakes nga aramid ko uray patayennak,” naala na ti riknana a nangibaga. Indumudom na ti rupa na kadagiti dakulap na. Saan ko a sinungbatan ngem ketdi pinamrayak ti nagtugaw ken indasaran ti bagik kadagiti taraon nga adda iti lamisaan. Idi itungraraw na ti ulo na ket inisemak a sigud. “Naimas gayam nga agluto ti agbalin nga asawak,” inkidday ko. “Ngem amang a naimimas ti agek nga appitizer na. Come on, help yourself, it’s free, ‘ton bigat adda bayadnan.” Inbato na kaniak ti panyo na ket bimtak ti katawa kadagiti bibig na. Immasideg a sigud ket pinunggos na ti buok ko sa na indumudom ti rupak iti tian na. Inagawaak nga isarapa ti maysa nga imak iti ngiwat ko tapno saan a maimansa ti kankanek iti blusa na, ngem naisagod metten iti nagtiponan dagiti saka na. Napasardeng isuna ket ginuyod na dagiti akin-likod a buok ko tapno mapatangadak. Nakitak a kagkagatenna ti akin-baba a bibig na ket inpagarup ko a makaisbo. Sinipat na ti abagak ket idi laeng a nalagip ko ti naiyawawan a dakulap ko. Makunak a ti panaglinnailo ti agayan-ayat ket kasla met laeng panagaramid ti iket ta kas kuna dagiti mangngayuma a lallakay idiay ayan mi, no narugyam ti agiket ket kasla saan mon a kayat a sardayan. Kasla kasta ti napasamak ta napasarunoan pay daydi immuna ken maikadua a panagsarak mi. Saan mi nga ingginggina ti rigat ti mangliklik kadagiti turay wenno pannakabagi ti pammati nga Islam. Pakaragsakan mi unay no adda mangawis kadakami a tumaripnong kadagiti naisangsangayan a kanito dagiti pada a Pilipino nga addaan pamilya agsipudta maaddaan kami iti gundaway nga aglinnailo. Ngem ti kapya ken ayat ket adda latta kabinnalubal na. Maibagak a basol ko ta saan ko a marendaan daytay atap a kabalyo. Naisaritak ti maipanggep iti daytoy dita imununa a paset ti istorya. Awan met ketdi nagsaritaan mi wenno nagkinnarian mi ket ti laeng banag iti nagbaetan mi ket ti gabbo. Naibagak kaniana ti maipanggep kadakami kenni Sheryl ket kayat ko a tuldekan ti pakasaritaan mi. Saan na nga annugotan ta awan kano met ti panggep na nga agawennak no di ket bumingay laeng iti maipaay ko a ragsak. “Adda sakit ko,” inbutaktak na. “Kasla matayak iti sakit ti pus-ong ko no dinak a kaidda sakbay ti binulan a bisitak.” Naikulengak ket kasla a diak a patien ti nangngeg ko. Nagayayam iti panunot ko a mabalin a daytoy ket pudno wenno maysa laeng a kinaulbod tapno diak a panawan isu na. Kayat ko ti mangaasi ngem no aramidek ti kasta ket saan met a nainkalintegan iti biang ni Sheryl. Nagkariakon kaniana. “Adu met dita,” insingasing ko. “Sika ti kayat ko,” dinagdagus na a kinuna. “Sika ti makasapar ti kalikaguman ti bagik.” “Agpadoktor ka,” insingasing ko manen ket ginandat kon ti timmakder. Inggawid na ti imak ngem inwadag ko ket dinadaraskon a tinurong ti ridaw ti balay ti gayyem na. “Pagbabawiamto no dinak a pabus-oyan iti kayat ko,” inpakamakam na. “Ollyy, Ollyy, agsubli ka.” Inpukpukkaw na. Intangep ko ti ridaw iti likudak ket ninamnamak a nairamanen a nakalluban dita ti pakasaritaan mi. Ngem nagriroak ta di nagbayag ket naamuan ni Sheryl ti palimed ko. Inawagannak iti telepono ket kasta unay sangit na a nangipakaammo kaniak ti naawat na a surat a naragpinan ti ladawan. “Ania manen daytoy, Olly?” insangsangit na. Diak ammo no kasano ti panangirugik nga agpalawag ta diak ammo ti amin a linaon ti surat. Pattapattaek laeng a makapasakit iti rikna ken mabalin a makaguday-arapaap dagiti linaon na. Kayat ko a patalgedan manen ti inkarik ngem pinagduduaak nga amangan ipagarup na a pagangangawak laeng ti rikna na. Nangngeg ko ti pannakaisara ti linya ti telepono ket kasla kanalbaang a nangpirsapirsay iti linaon ti barukong ko. Iti maikadua a gundaway ket nagpukaw ni Sheryl iti biag ko. Saan a sumungbat kadagiti ayab ko iti telepono. Pasaray ko pay a patulodan ti sabsabong a naragpinan ti bassit a surat ngem kaskasdi a di matukay ti rikna na a mamakawan. Agarup tallo a lawas ti napalabas idi madamag ko a naglusolus isuna iti trabaho. “Padi, ba’t nandito ka?” siddaaw ti gayyem ko, maysa nga aldaw ti Biyernes a simmarungkarak iti restaurant na. “Anong nandito ka?” kunak a. “Ayaw mo na ba akong pakainin dito?” “Hindi sa ganu’n, Padi,” inkudkod na iti ulo na. “Akala ko magkasama kayong uuwi ni Sheryl,” inpalawag na. “Ano?” kaslaak nakigtot a nagkuna. “Kelan?” “Ngayon, Padi, ngayon ang uwi niya for good,” intulnetulnek ti gayyem ko ti tammudo na iti angin a kasla pammatalged. Saanakon a nagpampamayan ket umatiwerweren ti lugan ko nga agturong iti Tabuk Airport. Kasta unay kigtot daytay Indiano a nakapugiit iti igid ti pagrikusan a nakaipatongan ti eroplano a panggerra iti nagsangalan ti Airport Road ken kalsada nga agpa-Al-Hateen. “Kussukto,” ipukpukkaw na a mangiwadwadiwad kadagiti imana. Indiretsok ti lugan ko iti pagparadaan iti sango ti pagsangladan dagiti eroplano. Kasta unay ti kararag ko a sapay koma ta dida pay simrek iti pagurayan. Sinakawsakawkon dagiti masetas iti igid ti kalsada ket agdiretsoak koman a sumrek idi igawidnak ti guardia. Insenyas na a sumrekak iti ruangan nga awan pader na. Indissok ti tulbek ko iti kahon nga asul iti naipaabay a lamisaan ket sinumrekak a di nabuak ti pammatigmaan. Nadanon ko dagiti barkada ni Sheryl a mangipaypayapay kadagiti ima da iti ruar ti pagurayan dagiti agbiyahe. Nakitanak ni Sheryl ket sigud nga imbaba na ti ima a pagpaypayapay na iti tian na. Inyappot na ti maysa nga ima na iti bibig na ket nadlaw ko a nagkuyegyeg dagiti abaga na. Kasla kayat na ti agtugaw ta pasaray na talyawen ti tugaw iti abay na ngem naluktanen ti ruangan nga agturong iti eroplano. “Napakabigat naman ng dinadala ni Sheryl,” kinuna ti maysa a barkada na. Nadlaw ko a sinikil ti kaabay na a babai ti bakrang na. “Aray,” inpukkaw na. Kinita na ti kaabay na sa tinalyawnak iti malikudan na. “Hi, Olly,” insilpo na a dagus. “Hi,” insungbat ko iti mapilpilit nga isem. “Hay, sino na naman kaya ang susunod na bumbohin diyan at pagkatapos ay pasakitan ng mga demonyong lalaki na ‘yan,” insippaw ti maysa. Kasla a siak ti paspasagidan na. “Excuse me,” kinunak a sigud nga immasideg iti nagsao. “Please, pakiulit mo ‘yong sinabi mo.” “Alin?” inkusilap na. “Yung demonyo?” “Hindi,” inwingiwing ko. Kayat nga atipaen dagiti kadua na nga agsao ngem naisawangnan a dagus ti kayat na nga ibaga. Mabalin a gapu ta kagura na ti napasamak ni Sheryl, wenno mabalin a kayatnak nga umsien, no ania man ti panggep na ket pagyamanak unay-unay. “Ikaw, demonyo ka, pagkatapos mong buntisin ‘yung tao, kung ano-ano nang pasakit ang ginawa mo,” rumrumsik dagiti mata na a nangtudutudu kaniak. “Tara na nga,” inyawis na kadagiti kadua na. “Baka kung ano pa ang magawa ko dito.” Insurot ko laengen ti panagkitak kaniada. Mabalin nga iti panpanunot da ket makaguraak ngem ti kabaliktadanna ti kinapudno. Pagyamanak unay ida iti dayta a damag numan pay saan a nasayaat ti pannakaibaga na. Inkeddeng ko a sigud ti masapul nga aramidek. Uppat a bulan ti inuray ko sakbay a naannamungan ti panaglusolus ko iti trabahok. Nabayag a panagur-uray ngem awan ti mabalinak ta masapul nga urayek pay a makaala da ti kasukat ko. No mabalin ko laeng koma ti tumayab ket inaramidkon ta agsasamusamen a rikna ti mangayay-ay kaniak. Nagdiretsoak a sigud iti ili mi idi sumangpetak iti Pilipinas ta pinagarup ko ket adda dita ni Sheryl. Inuray ko laeng a bumigat ket uray awan pay ap-ap ti tiyan ko napanakon iti balay da. Ti ama na ti nangilukat ti ridaw idi agapoak ngem dagus met laeng a simrek. “Ollyyy! Tumaraykan!” nangngegko a ballaag ti ina ni Sheryl. Napasanodak ket imbag laengen ta inaramid ko agsipudta idi maluktan manen ti ridaw ket naganeng-eng ti tadem ti pimmatani a buneng iti sigud a nagtakderak. Nariknak a dagus ti peggad ket inbuatitkon ti timmaray. “Kinninam, kinninam,” umanangsab a kumamkamat ti ama ni Sheryl. “Patayen ka, kinninam.” “Arayat, arayat,” kasta met unay a panangipukpukkaw ti ina ni Sheryl. “Pasardengen yo ni ama yo ket patayennan ni Olly.” Tinalyaw ko ti likudak ket agarup tallo a deppa laeng ti baetan mi kenni ama ni Sheryl. Iti likudan na ket sumarsaruno dagiti tattao. “Pangpangaasim, pangpangaasim, agsardeng ka,” kuna ti maysa. Saanak a nalaing a tumaray ngem iti dayta a gundaway ket mabalin nga inabak ko ni Lydia de Vega. Kaslaak nga insiwet a nakigtot nga aso ta pagamuan ket addakon iti paraangan mi. Kasla bumtak ti barukong ko a naguldag iti sala. Diak pay naala ti nasayaat a panaganges ko idi mangngeg ko ti pukkaw ti ama ni Sheryl. “Kinninam, Olly, rumuar ka ditoy ta tadtaden ka,” ingarngaryet na. “ No idi immuna pinakawan ka. Ngem ita, nalabes unayen ti inaramid mo.” Nanakraang ti pimmatani iti pagruanganan a landok. Pagamuan adda nanalbuong. “Kumpadre,” boses ti amak. “Ibabam ta buneng mo ta agsasarita tayo iti nasayaat,” inmandar na. “No saan, agdisso dita muging mo ti sumaruno a bala.” Simmaruno ti ulimek a kasla nagsardeng nga aggaraw ti amin. Idi kuan nailukat ti ridaw iti sala ket simrek ti amak ken ti ama ni Sheryl. Agsangsangit ket nasakit unay ti panangmatmat na kaniak. Indumog ko ta diak a maperreng dagiti mata na. “Agtugaw ka, kumpadre,” indiaya ti amak. “Inkayo man ayaban dagiti lallakay,” inmandar na kadagiti tattao iti ruar. Naurnong dagiti lallakay kasakbayan ti pangngaldaw isu a pinangurongor ni inak ti maysa a baboy na. Ket bayat ti panangururay da a maluto ti pangngaldaw nagsasaritaan da ti puon ken gapu ti panangkanyar kaniak ti ama ni Sheryl. “Panagkunak ket saan tayo a makedngan daytoy a banag no saan tayo nga ikkan ti gundaway dagiti ubbing nga agsarita.” Inkeddeng ti maysa a panglakayen. “Ket wen no awan banagen a nasayaat ti panagsarita da,” inbuelta ti maysa. “Kasano ngaruden ti binabaiyan?” “Idta tayon a bumallaet manen a mangipakat iti rumbeng a kas maiyannurot iti paglintegan ti puli.” Inbaw-ing manen ti nagikeddeng. Napaangesak iti nauneg ta mabutengak iti mabalin a pangngeddeng ni Sheryl. Diak mabuteng nga agmulta no kas pagarigan man pilien na ti mangbiag ti anak mi nga agmaymaysa. Ti ibuteng ko ket ti pannakapukaw ko kaniana. Napagtitinnongan ngarud nga awan koma ti agaramid ti maikanniwas a kas koma ti panagkanyar. Mapalubosanak koma a sumarungkar kenni Sheryl nga awan manglaplapped malaksid laeng no nakainomak ti arak. Ti manglabsing kadagiti pagannurotan ket maikkan iti pannusa ken multa a kas maiyannurot iti paglintegan ti puli. Iti dayta a rabii ket insingasing ti amak a palabsek pay ta amangan adda pay tartaraudi ti pungtot ti ama ni Sheryl. Ngem gapu ta diak masbaalan ti iliw ko inlibas ko ti rimuar. Inpambar ko ti mapan makidap-ay ta mailiwakon kadagiti kapatadak. Ni Sheryl ti nanglukat ti ridaw idi agapoak. Nagpinnerreng kami iti nabayag a kasla man ar-arikapen mi kadagiti mata ti tunggal maysa ti sigud a rikna. Diak nateppelan ti bagik ket inarakup ko isuna. Intukod na ti kanawan a braso na iti abagak ket ti maysa nga ima na inpakurus na iti tiyan na. “Sorry,” kunak a sigud a nangapros ti ima a nakaparabaw iti tiyan na. “Umuneg ka,” indiaya na. “Agtugaw ka,” kunana idi makauneg kami. Saanak a nagtugaw a dagus ta inurayko nga agtugaw isuna ket kasta unay pinagyaman ko idi pinili na ti atiddog a pagtugawan. Maysa, nakunak iti panunot ko ket inabay ko isuna. Saan a nagkir-in a mangiyadayo ti bagina. Dua, nakunak manen iti panunot ko ket iniggamak ti kanawan a dakulap na. Inpabus-oy na ket miningmingannak. Pagamuan ginuyod na ti ima na ket timmakder. Tinurong na ti maysa a kuarto ket rimuar nga adda iggemnan a sobre. Inyawat na kaniak sa nagtugaw manen iti abay ko. Binagtibagting ko ti sobre kadagiti dakulap ko a kasla pugpugtuak ti kadagsenna. Ket pudno a nadagsen ta adda dita ti tulbek ti pagragsakak wenno pagladingitak. Napaangesak iti nauneg. Kinitak isuna. Kinita na ti sobre sa nangperreng. Inuyos ko ti nagyan ti sobre. Maysa a surat ken maysa a ladawan a nangiparang kaniak, ti saklot ko a maladaga, ken ti kabalyo a narigat a rendaan. Naappot ko ti ngiwat ko ta kasla kayat ko ti agpaggaak ta naaddaanakon ti balabala no ania ti linaon ti surat. “Daytoy kadi ti nakaigapuanan ti panagpasugnod mo?” inyawat ko kaniana ti ladawan. “Apay, adda kadi pay sabali?” inmiduot na. Tallo, nakunak iti nakem ko ta inawat na ti sinaok a panagpasugnod. “No inikkannak koma ti gundaway ko a mangkita ken mangipalawag kenka iti daytoy ket adayo koma a kanyarennak ni tatang mo.” Kinunak Inpalawag ko a ti ladawan ket naala iti panagkasangay dayta nga ubing nga anak ti maysa a gayyem. Inakok a naaddaan kami ti relasyon, bayat ti kaawan na iti biag ko, a kayat ko a tuldekan ngem saanna nga annamungan ta awan kano met ti panggep na nga agawennak. Inbagak a daytoy ket mabalin nga inaramid na gapu iti kinaawan namnama na nga agsubliak kaniana. “Nagkariak kenka,” iniggemak dagiti abaga na. “Ti karik ket kari….” Saankon a naituloy pay ta inarakupnakon. “Olly, I am sorry,” insangsangitna. “Ania ti…” nanalbaag ti ridaw ti kusina da ket naikuadro ti ama ni Sheryl a petpet na ti pimmatani. “Kumpadre,” naipukkaw manipud iti ruar ti balay. “Bay-am dagita ubbing a mangrisut ti problema da,” ni tatang ko. Nagpinnereng kami kenni Sheryl ket idi kuan nagallungoganen ti katawa. O(_)O